Svör birtast hér fyrir neðan
Hver yrðu tengsl sameiningar og samgönguframkvæmda?
Bættar samgöngur og ýmsar umbætur í þjónustu ríkisins geta beint eða óbeint oftlega orðið til þess að hvetja sveitarfélög til sameiningar. Þannig má benda á að með tilkomu Bolungarvíkurganga verður unnt að meta í alvöru hvort sameina beri Ísafjarðarbæ og Bolungarvíkurkaupstað. Þá eru Héðinsfjarðargöng forsenda fyrir sameiningu Siglufjarðar og Ólafsfjarðar í Fjallabyggð og voru byggðarlögin raunar sameinuð nokkuð löngu áður en göngin verða tekin í notkun.
Einnig má benda á að nýr vegur um Öxi gæti gefið Djúpavogshreppi tilefni til að sameinast Fljótsdalshéraði. Þá má gera ráð fyrir að Seyðisfjörður sameinist annað hvort Fljótsdalshéraði eða Fjarðabyggð eftir því hvernig bærinn tengist hugsanlega öðrum byggðum með jarðgöngum.
Jarðgöng eru þó fjarri því einu samgöngubæturnar sem ráðast mætti í á sameiningarsvæðum því hér koma til dæmis einnig almenningssamgöngur til skoðunar. Stærri heildir gera það kleift og jafnvel nauðsynlegt að komið sé upp þéttu neti strætisvagnasamgangna innan hvers sveitarfélags sem nái jafnvel yfir stærra svæði.
Stærsta atriðið í þessu efni er þó sú stefnumörkum samgönguráðherra við gerð samgönguáætlunar að samþætta samgöngugreinar í heild og þann ávinning sem sveitarfélög geta haft af framkvæmdum. Öll áætlanagerð í samgöngum miðar að því að framkvæmdir séu hagkvæmar, öruggar, umhverfisvænar, greiði mönnum leið og jafni aðstöðu byggðarlaga.
