102 Vegir í Evrópu enn of hættulegir.
Evrópusambandið mun, ef að líkum lætur, ekki ná markmiði sínu um að fækka dauðaslysum um helming frá 2001 til 2010. Árið 2001 voru dauðaslys um 54 þúsund og því mundi helmingsfækkun þýða að árið 2010 yrðu þau 27 þúsund. Árið 2009 virðast um 35 þúsund manns ætla að týna lífinu í umferðarslysum í Evrópu.
Sum lönd, eins og til dæmis Spánn, Frakkland, Luxemborg og Portúgal hafa náð því að fækka dauðaslysum um næstum því 50%. Önnur lönd eins og t.d. Danmörk, Malta og Pólland hafa náð sáralitlum árangri og í Búlgaríu hefur dauðaslysum fjölgað um 5%.
Þetta kom fram á ráðstefnu um öryggi á vegum þann 2. desember 2009. Ráðstefnan var haldin til að undirbúa næstu aðgerðaráætlun um öryggi á vegum sem gilda á á árunum 2011 til 2020. Sú áætlun verður að taka á höfuðorsökum dauðaslysa á vegum eins og hraðaakstri, áfengisneyslu, að öryggisbelti séu ekki notuð og þreytu. Þá þarf hún að beinast að þeim sem eru í mestri hættu eins og ungum ökumönnum, mótorhjólamönnum og eldra fólki. Mögulegar aðgerðir gætu verið að herða öryggisskoðun bifreiða, auka fjárfestingar í öryggisþáttum innviða og efla þjálfun.
Þá er í skoðun að auðvelda lögsókn á hendur brotlegum ökumönnum á milli landa en Lissabon sáttmálinn og samþykkt hans auðveldar það til muna. Til að mynda var undirbúin og kynnt tilskipun af hálfu framkvmdastjórnarinnar árið 2008 sem auðveldar skipti á upplýsingum um umferðarlagabrot á milli ríkja. Markmiðið var að ná betur að skjalfesta brot ökumanna. Tilkskipunin stöðvaðist í ráðherraráðinu sem efaðist um lögmæti hennar. Lissabon sáttmálinn mun væntanlega auðvelda samþykkt hennar.
Þetta má lesa í 3873-hefti Europolitics en það má finna hér.